Óskabörn Óðins MC Iceland

Óskabörn Óðins MC var stofnað þann 27.03.1988 af Steinþóri Stefánssyni ásamt þremur félögum sínum. Steinþór lést skyndilega daginn eftir. Hugmyndir um virkan mótorhjólaklúbb fyrir utan Sniglana voru litlar. Fór lítið fyrir Óskabörnum, þangað til fjórir félagar, Raggi Minkur, Gunni Klútur, Arnar Standby og Tösku Atli ákváðu að vekja upp klúbbinn frá því að vera eitthvað sem menn töluðu um, í að vera klúbbur sem fólk tæki virkilega eftir.

Rykið var þurrkað af bakmerkjunum og þau handsaumuð á þykk leðurvestin. Eftir blöðrur og blóðuga fingur, sá fólk að klúbburinn var virkilega til og að þeir sem slíkir væru að “hjóla”. Klúbburinn óx hægt í byrjun og hefur með tímanum vaxið enn hægar.

Óskabörn Óðins gáfu þeim sem óskuðu góð ráð um hvernig ætti að byggja upp góðan MC-klúbb og voru margir klúbbar stofnaðir, en með þeim formerkjum að þeir yrðu sem fyrst stórir og öflugir / virkir en flestir þessara klúbba leystust upp.

Aðeins nokkrir klúbbar hafa náð að lifa af fæðinguna og skapa sér stöðu meðal mótorhjóla fólks á Íslandi.

Fyrsta blótið var haldið árið 1994 á suðurlandi og fékk nafnið Freysblót en Freyr gaf mikinn vind og vatn, ákveðið var að stóla á Þór næst. Þórsblót árið 1995 heppnaðist mjög vel þrátt fyrir vind og vatn og því ákváðu “ Óskabörn Óðins” að blóta Þór framvegis, það þótti nefnilega ljóst að það skifti ekki máli hvern guðanna þeir blóta, vatnið og vindurinn yrði alltaf til staðar.

Óskabörn Óðins hafa nokkur undan farin ár haldið þorrablót í klúbbhúsi félagsins, sem hefur ávalt verið vel sótt og engin ástæða til að hætta því.

Meðlimir Óskabarna Óðins eru tuttugu talsins, þar af búa tveir af meðlimunum í Danmörku og einn í Noregi. Nokkrir af meðlimum “ Óskabarna Óðins” eru heiðingjar og því meðlimir Ásatrúafélagsins, þar sem menn trúa á forna norræna guði.

Óskabörn Óðins er MC klúbbur sem leggur áherslu á félagana.
Um helmingur félaganna eiga Harley, en það er ekki skylda til að vera í klúbbnum því félagsskapurinn er númer eitt en ekki hjólin. Það skemmir þó ekki fyrir, skifti menn gamla kawanum út fyrir Harley. Óskabörnin hafa gegnum árin verið virk innan Bifhjólasamtaka lýðveldisins Snigla, þar sem stór hluti Óskabarna Óðins eru eða hafa verið meðlimir af sniglunum.

Óskabörn Óðins eru með klúbbhús í Kaplahrauni 18 Hafnafyrði, þar sem margir meðlimanna ditta að hjólunum sínum á veturna og er allt mótorhjólafólk velkomið að kíkja í kaffi.

Ef þið viljið hafa samband þá erum við að sjálfsögðu allir með að minsta kosti einn GSM síma, svo það er engin afsökun að segja að maður hafi ekki náð sambandi.

Óskabörn Óðins / Odins Ønskebørn MC

Frægir í útlöndum...sönnunargagnið sjálft er hérna fyrir neðan!